Chin State, Matupi township-ah Military Council sipai ten khawpui luh chhuahna Gate, khar te October 8 atang khan an hawng leh tawh a. Tualchhung mipui zin chhuak tur te chuan Administrator leh Military Strategist hnena phalna lehkha lak hmasat a ngaih thu hriat a ni.
“Kawng chu an hawng tawh a, an khar lai chuan tu mah chhuah an phal lova, phalna lehkha pawh lak a ngai lo. Tunah chuan Pakokku (Pa Khuk Ku) khawpui lama zin chhuah dawn chuan Administrator hnena phalna lehkha lak hnuah Military Strategist hnenah lak leh a ngaia chumi hnuah chuah a tei chhuah theih” tiin Matupi khawpuia tualchhung mi pakhat chuan a sawi.
Thla liam ta September 19 atang khan Military Council sipai ten Matupi khawpui luh chhuahna Gate an khar vek avangin tu mah an chhuak thei lova. Ei chawp thil leh bungrua eng chi mah an thliar luh theih loh avangin mipui ten ei leh inah harsatna an tawk nasa hle.
Tun dinhmunah hian Matupi khawpui luh chhuahna Gate an hawn tak avangin khawpui chhunga tlawhtu leh ei in bakah bungruate phur luh leh a ni tawh a. Khawsakphung pangngai angin an awm leh theih thu hriat a ni.
Matupi township-ah hian Township Education Officer U Tin Luai, an thah hnu hian School khar dinhmun thlenga an thlen thu tualchhung mi pakhat chuan a sawi zui bawk.
“School an khar chu a ni hran lo zirtirtute erawh an kal a, zirlai ten an hlauh avangin an chhung ten kal an phal lova. Education Officer an thah avangin zirlai kal awm lo ang tluk a ni. CDF thalai te an lut chhuak bawk nen an hlau a ni bet mai” tiin Matupi khawpuia tualchhung mi pakhat chuan a sawi.
Matupi township Education Officer U Tin Luai hi Military Council-te zirma lama buaipuitu Non CDM a ni a, CDM-te chet velna kawng hrang hrang hek thintu a nih avangin an kap hlum a. CDM-te hming list Military Council-te hnena pe thintu, CDM lemchangte sorkar thla hlawh Major Win Naing nena laksak thintu a ni bawk. Chuvangin CDF-Matupi ten lehkha leh tawngkaa vawi duai lo, ti tawh lo tura an hrilh hnu pawha a zawm duh lo avangin CDF-Matupi ten October 17 khan an kah hlum thu an thuchhuahah an tarlang.
