Chin State chhim lam Matupi khuaah thla 3 vel mobile phone hman theih loh a nih hnuah Landline phone hmangin chhungkaw inbiakna bun a ni a, minute khat chhung leka phone biak man a san zual thu Matupi khuaa khualzin mi pakhat chuan a sawi.
“Mobile phone a hman theih loh. Landline-in kan be thin a, minute 5 kan biakin Kyats 1000 min bill thin a, engmah kan sawi hman lo, thil awm dan kan zawh pawhin an sawi ngam lo” tiin Matupi khuaa mi pakhat chuan a sawi.
Mindat khuaah pawh Mobile phone a hman theih loh avangin tualchhung mipui ten Phone awmna apiangah kan kal thin a. Chanchin inhriat chian theih nan phone hman an pawimawh bawk sia tiin Mindat khuaa mi pakhat chuan a sawi.
“Phone awmna hmunah kal kal a, signal a tha bawk si lo, kan insawn kual thin a, a panna lah a hla bawk sia. Media hun a ni bawk a, internet an that loh pawhin phone signal tal thaawm tak a ni” tiin Mindat khuaa tualchhung mi pakhat chuan a sawi.
Chin State-ah hian Halkha khua tel lovin township dangah internet an kharna kum 1 a chuang tawh a. Tun hnai lawkah pawh khan Matupi khua, Mindat khua leh Kanpalet khuaah mobile phone a hman theih lohna thla 3, a chuan thu hriat a ni.
Matupi khuaah mobile phone a hman theih loh avangin Landline phone hman thin a ni a. Ram pawn atanga an chhung te phone luh a theih loh avangin harsatna an tawn thu Matupi tualchhung mi pakhat hnen atanga hriat a ni.
Tun dinhmunah Matupi khuaah Landline phone hman mek a ni a, phone hman tur a tlem avangin Myanmar communication hnenah Landline phone chah mek an tam thu hriat a ni.
