Chin State chhim lam, Paletwa township-ah ruah a sur reng avangin Kalatan tuipuia tui a len avangin lei a min nual a, Paletwa khuaa Boarding school bakah chenna in 15 aia tlem lo a chhiat thu Paletwa Kristian tlawmngai pawl (PCSRRC)-ten an sawi a.
Paletwa khuaah hian July 27 atangin August 7 thleng khan ruah a sur nasat avangin lei min leh kawng chhia bakah lei minin In a hnawl leh tuilianin a hnawl a tam hle thu PCSRRC-ten August 9 khan an thuchhuahah an tar lang a ni.
Paletwa khuaa PEC Boarding school neitu Rev. Tun Kyaw chuan “ Kan boarding school chhawng 2-ah hian zirlai 17 an awm a, ruah sur nasat avangin lei minin a chim hnan vek” tiin a sawi a.
Heng bakah hian chenna in 5 a chim a, In 10 chuang a chhiat thu hriat a ni bawk.
Hetianga chawlhkar khat chhung ruah a chen avangin Kalatan tuipui pawh feet 40 chuangin a sang chho va, tui kuang a liam avangin a chhehvela leilet hmun leh khaw chhehvel hrang hranga In a chim nual thu tualchhung mi te hnen atanga hriat a ni.
Tuilian avangin In a chim nual a, tualchhung mi te hmun him lamah an inthiar fimhlim nual a, an dinhmun an harsat avangin a theih ang anga tanpui an ngaih thu Paletwa Kristian tlawmngai pawlten an tlangau a ni.
