Sagaing region, Tamu khua Moe Mah veng no. 12/A, Nanphalong high school pahnihnaa inkulh firfiak military council sipaite chu April ni 17 zan dar 7 vel khan PDF-Tamu battalion 1 leh 2 -a special commando ten an thawng thut a, sipai 4 an kah hlum thu hriat a ni.
Chung sipai thi zingah sipai officer pakhat telin sipai 4 chu school kawt kawngpuiah an thi a, PDF lam chu hlawhtling takin an tawlhsawn thei a. Chu mi hnuah Tamu khaw lam atgangin damdawi lo phur motor lo kalin sipai thi tate chu an phur chhuah thu PDF Tamu battalion 1-in thuchhuah a siam a ni.
Chutiang bawkin, Pale township, Min Pyin Tai khua atanga chhuak LIB 386-a sipai force 120 vel chu Kyi Nin Gyi khaw hmar lam no. 6 tuikhuah kam bulah April ni 18 chawhma lam dar 10 vel khan Pale PDF, Pale Township battalion 1 & 2, Myaing Hero Generation၊ Guerilla Ranger leh Local PDF tangrual pawlin lambunin an bei a, sipai 4 an kah hlum thu hriat a ni.
Chu inkahna chu darkar chanve vel a ni a, pawl pahnihte chu an inkap tawn a, mipui venghimtu pawl lamah tumah hliam leh thi awm lovin, an tawlh sawn theih thu hriat a ni bawk.
April ni 18, zing lam dar 8 velah pawh Chaung Oo khua atanga chhuak sipai motor 2 chu Chaung U Local Defence Force (CHU LDF) leh Alliance pawl tangrual ten Chuang Oo khua leh Nghanuh kaw inkarah remote control bomb hmangin an lo bei a, sipai 8 a hmunah thiin, 4 an hliam bawk thu hriat a ni.
