Sagiang region, Tanse township tlak lam Kyikan (Chi Kan) khuaah February 25 zan khan Military council sipai 150 rual ten an luhchilh avangin Ye U khua, Tanse khua leh Kalaywa khua kawngpui kama khaw 19-a tualchhung mipui 10000 chuang an inthliar fihlim thu tualchhung mi ten an sawi.
In 600 chuang awmna Chaung U khua, in 300 chuang awmna Kyi Kan khua leh Kha Yan Chain khua telin khaw 19-a tualchhung mi te an tlanchhiat chu security zinga hming thup pakhat chuan RFA Media hnenah a sawi a ni.
“Heng khua te hi motor kawngpui kamah awm te an ni a, tunah rih chuan an tlanchhe vek tawh a ni. Military council sipai te kir leh mah se, an la haw duh rih lo” tiin a sawi zui bawk.
Military council sipai ten khua an luhchilh hian ralthuam lian leh te, an kap nasa hle a, chenna in an hal chhiat nual thu tualchhung mi ten an sawi a ni.
Tualchhung mi te an tlanchhiat chungchangah Sagaing region thupuangtu region Social Affairs Minister U Aye Hlaing RFA Media ten an phone-naah chhanna a awm rih loh a ni.
Sagaing region-ah Tanse khawpui telin In Taw, Ban Mauh, Kawlin, Pin Le Ku, Myuang, Pale, Salin Gyi, Yinma Pin, Khin U, Ye U township-ah Military council ten Martial Law an puang tawh bawk a ni.
UN, mipui chhawmdawl insuihkhawm pawl (UN OCHA) ten kumin 2023 February 2 thlenga an chhinchhiah dan chuan Military council ten thuneihna an lak hnu hian Sagaing region-ah tualchhung mi Nuairuk leh singnga (650000) chuang in leh lo an tlansan thu an tarlang a ni.
