Chin State hmar lam, Tedim khawchhunga mipui sum leh bungrua bakah Bike nen lam ru thin mipa 4-te Tedim thalaiten May 7 khan an man thu hriat a ni a.
Heng rukhmang mi 4 te hi ruihtheihthil ti mite an ni hlawm a, tun hnai lawk atang khan Tedim khawpuiah ruk bo leh thil bo an tam sawt em avangin thil awmzia an chhui hnuah heti hian an man thu thalai hruaitu zinga mi pakhat chuan a sawi a ni.
“Tun hmaa kan hriatsa te an ni a, tun hnaiah an hluar lehzual a. Thil bo a tam zawt em avangin thalai mi 15 rual velten an awmnate chhuiin kan veh hlawm a, hmun pakhata an tawm khawmnaah kan man ta a ni” tiin a sawi a.
Heng rukhmang mi 4 te hi Teddim police Station-ah ni 14 chhung an khung rih dawn thu hriat a ni a.
May 7 Sunday khan Myoma (Miauh Mah) Ward-ah inkhawm laiin in pakhat rawk a ni a, Kyats nuai 2 chuang ruk bo a nih thu hriat a ni a.
Hetiang vek hian chawlhkar liam taah khan Tedim khawpuia Sport manager chenna in rawk a ni leh a, Battery pakhat, Laptop computer pakhat, naupangho sum khawl te ruksak a nih leh thu tualchhung miten an sawi a.
Tun hnai lawk atang khan Tedim khawpuiah chenna in rawk leh thil bo a tam sawt hle avangin In chhuahsan mai lova, In nghak awm reng a tul thu a infuih nasa hle a. Heng rukhmangte hi a huhova an chet thin thu leh chhun enah pawh an ruk thin thu tualchhung miten an sawi bawk a ni.
Tedim khawpuiah hian ruihtheihthil zuar te leh thil ruk lei chhawngtute an awm chuan a phu tawka hrem an nih dawn thu Tedim thalai hruaitu pakhat chuan a sawi a ni.
Military council-ten thuneihna an lak hnu hian Tedim khawpuiah ruihtheihthil ti mi leh rukhmang an hluar sawt hle thu hriat a ni bawk.
