Magwe region, Thilin township, AKyiBan khuaah May 6 zing dar 10:00 vel khan Military council sipaiten an luh chilh avangin a khawpum deuhthaw chenna in an hal bakah tualchhung mi 2 an thah thu tualchhung miten RFA Media an hrilh a.
KyuatThut (Chauh Thuh) khaw atanga chhuak Military council sipai 80 rualte leh ThiLin khua atanga chhuak Military council sipai 170 vel rualten khawchhung an luh chilh hnuah chenan in an hal chhiat nual thu tualchhung miten an sawi a.
In 200 chuang awmna AKyiBan khuaah hian tunah In 30 vel chauh an awm tawh thu thuneitu hming thup pakhat chuan RFA Media hnenah heti hian a sawi a.
“Tun dinhmunah hian khawchhungah Buddist school telin In 30 vel chauh an bang tawh a, tualchhung mi 2 an that tawh bawk” tiin a sawi a ni.
Tualchhung mipuite hian a chhehvel khuaah leh ramhnuaiah an tlanchhe nual a, thi leh hliam zat kimchang hriat a la ni rih lo a.
He khua hi ThiLin atangin Saw khua leh Pakokku khaw kawnga awm a ni a, Military council sipaiten ration an phurh laiin he khaw hi an hal thu tualchhung miten an sawi a ni.
He buaina chungchangah hian Magwe region, Military council sipai thupuangtu an zawhnaah chhanna a la awm rih lova. Military council thupuangtu General Zaw Min Tun chuan keini sipaite hian tualchhung In reng reng vawi khat mah kan la hal chhe ngai lo tiin RFA Media ten an zawh tawhnaah a lo chhang tawh thin a ni.
Data For Myanmar ten March 19-a an thuchhuahah chuan Military council sipaiten thuneihna an lak hnu atangin kumin 2023 February thleng khan Magwe region-ah Military council sipaiten chenna in 9019 an hal chhiat tawh thu an tar lang a ni.
