Yangon Region, Social Minister U Naingngan Lin, nupui Daw Khin Sandar Win leh NLD Party palai 2 tiamin mi 12 te chuan CDM-a thawktute leh PDF te, ei in tur leh sum leh paia an tanpui thin avangin sipai ten manin thubuai an awrhtir thu News and Information chuan August ni 26 zan khan Military council thuchhuahah an tar lang.
U Naingngan Lin, nupui bakah Pyithu Hluttaw palai Daw Khin Myait Thu, Daw Ni Ni May Myint leh an thiante chu sipai ten manin thubuai an awrhtir a. Daw Khin Sandar Win hian Mingalar Don PDF hnenah buhfai leh thil dang a pek thin avangin Insein Township, Ywa Ma chhuah lam Ward, Hlaing Mynit kawng, Insein Jail bulah August ni 25 khan sipai ten an man thu an tar lang.
Daw Khin Sandar Win an man ruala tel ve, a pafa kum 9 mi chu a mit an tuamsak a, August ni 25 khan sipai ten a chhungte hnenah an thlah leh a.
NLD Party Pyithu Hluttaw palai Daw Khin Myait Thu pawh Yangon Region-a CDM thawktute tanpuitu zinga, a hnarkaitu ber tiin August ni 21 khan Military council ten an man a.
May ni 12-a, sipai ten an man tak Daw Ni Ni May Myint hi May thla atang khan Yangon Region –a CDM hruaitute sum thawntu tiin nimin piah khan sipai thuchhuahah tar lan a ni.
Terrorist Military council te hian ram hruaitu NLD party te, MP te, Zirlai naupang te, ram tana active thalai rual te leh mipui tam tak man nualin thubuai a awrhtir a ni.
