All India Radio News Aizawl chuan Indian Meteorological Department, Regional Meteorological Centre, Guwahati-in hriattirna a tihchhuah danin May 13, 14-ah te hian Mizoram-ah ruah nasa tak sur tura hmuh lawk a ni a. Tun May 14 (Pathianni) lo awm turah hian thlipui na tak rawn thawk thut thei a nih bawk thu leh thlipui bakah ruahpuiin chhiatna a thlen theih laka an him theih nan mi tinte fimkhur turin a ngen a.
Hemi chungchangah hian Disaster Management & Rehabilitation Department chuan mipuite hriat tur thu a chhuah a, chi-aina tur a awm loh thu leh inrin lawk erawh a tul thu a sawi a. Mahni in leh a velah thliin a tihchhiat mai theih te thawm that vek tur a ni a. Kawngka leh tukverh zawng zawng nghet taka kalh theih tura siam vek tur a ni a. In chung leh bang te, ran in, ek in chung leh bangte kilh that leh tawn that vek tur a ni bawk. Pawnah leh inchungah thliin a chhem sawn thil eng mah dah loh tur a ni a, tha taka delh beh emaw tawn beh leh kilh beh vek tur a ni.
In bul velah thlipuiin a chhem tliah mai theih thingkung leh thing zar a awm em tih en fiah vek tur a ni a, chutiang a awm a nih chuan a theih anga lo then fai lawk vek tur a ni.
Thlipui a lo tleh a nih pawhin chi-ai mai loh tur a ni a, thli tleh zawh hma chuan pawnah chhuah loh tur a ni. Chhiatna a thleng a nih chuan bialtu sorkar thuneitute hrilh vat tur a ni a.
Ramhnuai lama hnathawk mi tan awmna buk leh thlam thawm that vek tur a ni a. Thli tleh laiin thingkung hnaihah awm loh tur a ni tiin mipuite a hriattir a ni.
