Mizoram State, Champhai District huam chhunga Myanmar raltlan ten an ID (Hmat Pong Tin) te April 15 hmain an awmna Veng leh Khuaa raltlan tanpuitu pawl te hnenah pe theuh turin Champhai District Bawrhsap Pu James Lalrinchhana chuan a hriattir a.
Champhai District raltlan tanpuitu pawl District Level Committee on Myanmar Refugees chairman ni bawk Pu James Lalrinchhana chuan April 3-a a thuchhuahnaah Myanmar raltlan ten an zawm tur dan 5 zingah ID (Hmat Pong Tin) pe khawm vek tura a phut thu a tel a ni.
Hetia an buatsaihna chhan hi Myanmar raltlan ten anmahni duh thua in sawn kual te, palh a awm avanga Myanmar-a kir ruk leh dan lova man a nih thu hlaah tangkaina a neih theih nana hmalak an rin thu raltlan tanpuitu pawl zinga mi ten an sawi a ni.
February 15 khan Champhai-a Chin mi Pu Bawi Ro Piangan a nupui hlui kum 43 mi Pi Siang Ngun Pari a chenna ina a kah hlum hnuah Myanamar lamah a tlanchhia, vawiin thlengin an la man rih lova.
March 22 pawh khan Mizoram State Siaha khawpuia tualchhung mi 3 te Indo-Myanmar ramri-ah thah an nih chungchangah Myanmar revolution beitu ralthuam keng pawl te zinga mi te an nih rin an ni a.
Heng thil thleng boruak avangin Mizoram State-a thuneitu ten Myanmar raltlante chungah an fimkhur zual hle nia ngai pawl an awm bawk a ni.
Champhai District Bawrhsap Pu James Lalrinchhana, Chairman, District Level Committee on Myanmar Refugees, Champhai District chuan Village Level Committe on Myanmar Refugees (VLCMR) hi mumal taka kalpui tur a ni a. Thla tin vawi khat tal meeting an ko tur a ni. Meeting report hi Chairman, District Level Committee on Myanmar Refugees hnenah an theh luh tur a ni.
Myanmar Refugee zawng zawngin an Myanmar ID Card (Hmat Pong Tin) te Village Level Committee on Myanmar Refugees hnenah April ni 15, 2023 ral hmain an theh lut vek tur a ni a, VLCMR-in an lo kawl tha ang.
Myanmar Refugee-te an awmna Veng emaw Khua te hriatpuina lovin an duh duhnaah an kal sawn thin tih thu dawn a ni a. Hemi a nih avang hian Village Level Committee on Myanmar Refugees (VLCMR)-in permit a pekte chauhin an awmna veng, khua an sawn thei ang. Hemi kaihhnawiha District chhuahsan tur leh lut tur Motor-te Police leh Assam Rifles ten an endik ang.
Dan leh thupek chungchangah an awmna VLCMR / YMA ten uluk takin an vil tur a ni. Myanmar Refugee-te dawr siam leh sumdawnna thil chungchangah, Village Level
Committee on Myanmar Refugees (VLCMR) meeting-in phalna a pekte chauhin dawr siam leh sumdawnna an khawihin an kalpui thei ang.
Champhai District hi Myanmar raltlante awm tamna ber a ni a, khaw 47-ah mi 10226 an awm a, mipa 3033, hmeichhia 3264 leh naupang 3929 an awm thu hriat a ni. Heng raltlan zinga mi 2643 te hi raltlan camp-ah an awm a, mi dang 7583 te erawhchu camp pawn, a rem remna hmunah an awm thu hriat a ni bawk.
