Bay of Bengal chhim chhak lam chhum insiam thlivir hna thawh avangin May 9 khan Cyclone tenau deuh a siam chho tawh a, Myanmar leh a chhehvel hmun hrang hrangah thlipui a tleh theih thu Military council hnuaia khawchhin thlirtuten May 8, chawhnu dar 12:30 khan khawchin an tehna atanga hriat a ni a.
Cyclone Mocha-in tuna a kawng tura rin mek hi a rawn zawh a nih chuan a laibu (eye) hian May 14-15-ah hian Rakhine hmar tawp, Chin State leh Kale-Kabaw a pal tlang ang a, a bul hnai Chittagong, Tripura, Mizoram, Manipur, Assam chhimchhak, Nagaland chhim lam, khawchhak lamah Rakhine, Magwe, Mandalay, Sagaing region te chu cyclone huam chhungah an tla vek dawn a ni.
Mizoram hi ECMWF hian ruahpui nasa lutuk sur lo turin ring mah se, IMD chuan darkar 24 chhungin 20-70 mm lai sur thei turin a chhut a. Tui lian thut leh lei min te thleng thei dinhmun a nih avangin inthlahdah lova thil chinchang ngaihven reng a tul thu an sawi bawk a ni.
Social Media Facebook Group-a Khawchin & Science chuan “Cyclone Mocha chuan May 14 hian Rakhine State hmar tawp lam khawmual a hrut ang a, May 15-ah Tahan leh a chhehvelah a rawn thleng thei ang” tiin a tar lang bawk a ni.
Tahan leh a chhehvel a rawn thlen hian thlipui tha chak lam 30 Kts (40 mph) aiin a tla hniam tawh ang a. Mahse, thli na thut thut thei (Wind gust) a awm theih avangin thli inhlap natna laiah hei ai hian an na mai thei a ni tiin a tar lang zui bawk a ni.
May 14,15-ah hian Kale-Kabaw (Tahan leh Tamu chhehvel) phaizawlah Cyclone thlipui vangin ruahpui vanawm a sur thei a, tuihawk lakah leh sabereka khuangkaih laka mipuite in veng lawk turin a hriattir thu a tar lang bawk a ni.
