China sorkar Asia affairs special envoy Deng Xijun chuan Myanmar hmar lama ram leilung fate ralthuam keng pawl awmna thenkhatah tlawhin sawihona an neih thu hriat a ni.
Wa State Unity Army (UWSA), Kachin Liberation Organization (KIO), National Democratic Alliance (NDAA) te office hmun pawimawh a tlawh nual a, an officer te nen thu an sawiho thu RFA Media te hnen atanga hriat a ni.
UWSA thupuangtu U Ngi Yan chuan “Kan sawiho ber chu Myanmar ten zalenna an hmuh theih nan a ni ber mai” tiin RFA Media a hrilh a ni.
An sawiho thu kimchang erawh hriat chian a ni lova, China sorkar Asia affairs special envoy Deng Xijun zin chungchangah KIO leh NDAA te, RFA Media ten an ngaihven mek a ni.
February 18 khan US Secretary of State Anthony Blinken leh China's Central Foreign Affairs Commission Wang Yi te an inbiak hnu rei lo teah China sorkar Asia affairs special envoy Deng Xijun-in Myanmar Northern ethnic armed group te a tlawh thu hriat a ni.
China sorkar Asia affairs special envoy Deng Xijun leh Myanmar Northern ethnic armed group te inbiaknaah hian US Washington DC-a NUG office hawn chungchanga an duh loh thu Mekong news chuan a tarlang a ni.
