Khawvel magazine lar ber zinga mi TIME chuam kum 2021 atana khawvela mi hneh thei ber (most influential people) tu 100 a thlan chhuahah Myanmar hmeichhia 3-te pawh an tel ve a.
TIME-in a thlan chhuah Myanmar hmeichhe 3-te chu Kachin hmeichhia Ester Zaw Naw leh Shan hmeichhia Ein Thinzar Maung ethnic mi 2 leh Myanmar mi US khua leh tui nihna nei, Engineer Scientist leh NASA Jet Propulsion Laboratory (JPL)-a Project Manager Mi Mi Aung te an ni a.
Ester Zaw Naw: Kachin nula Ester Zaw Naw hi ni kum khan Myanmar-China border refugee camp-ah lehkha zirin, ramria Candle Light Library dintu, ram danga lehkha zir paha, ram chhung lut chhuaka hmasawnna kawng hrang hranga hna thawk thintu a nih thu a thiante an sawi a. Chutih rualin Ester-i hi Kachin Peace Network hruaitu zinga mi a nih mai bakah Rohingya-te tana huaisen taka hmalatu tlemte zinga mi a ni. Ani chuan, hetianga TIME magazine-in khawvela mi hneh thei ber 100 zinga thlan chhuah a nihna hi tun lai Myanmar ram chhung politics boruak chu ram dangin an ngaihven hle tih tarlan pakhat a nih thu a sawi a.
“Myanmar ramah thalai nih, hmeichhe nih, ethnic mi nih, Buddhist nih loh ang zawnga inthliarhranna avangin, mahni rinna huaisen taka kalpui chu ni tin nunah harsatna tam tak a awm a. Mahse, chutiang ngaihdan dik lo vaw chhe theite chu khawiah pawh mamawh an la ni reng a. Tun hi culture dik lote do dalna hun a tha a ni. Khuahkirhnate chu Fascism nen a ruala vuak chhiat vek tur a ni. Generation tharte tan rochun tur tha siamsakin a tha lo tur chu kan dah bo a ngai a. Chuvangin, engti khawpa harsa pawh ni se, indo tawpnaah hian tha thlah lovin, khawng hrang hranga tel chhunzawm zel turin ka chah duh che u a ni,” tiin a sawi bawk a ni.
Ein Thinzar Maung: Shan hmeichhia Ein Thinzar Maung hi Democratic Party for a New Society (DPNS)-a Chairman a ni a, democracy education lam hawia kawngzawhnaah a tel thin a, mipui hriat lar Student Union leader pakhat a nib awk. Kum 2012-ah All Burma Students’ Union-ah a intat lut a, education system thlakna kawnga hmalakna, Letpantaung Taung Copper Porject titawp tur leh Civil war titawp tura hmalaknaah hruaitu a ni chho deuh zel a. Kum 2013-ah Yadanapon University-a Student Union President a nih rualin student movement history-a hmeichhe hruaitu president nihna chelh hmasa ber a ni bawk.
Pi Ein Thinzar Maung hi ethnic rights tana kum tam tak hna lo thawk a, lo fight tawhtu a nih angin, tun hnai lawk khan National Unity Government-ah National Youth & Child Affairs Deputy Minister nihna pek a ni ta hial a. NUG sorkar-a Deputy Minister-a ruat zingah a naupang ber bawk a ni.
Pi Mi Mi Aung: America rama cheng engineer scientist niin, April ni 19 khan March thla leilungah Ingenuity helicopter tia koh chu a history-a a vawi khat nan a thlawh luhtir a. Chutianga thlawk lut thei tur chuan engineer leh scientist rual hovin ngaihtuah sengin an buaipui a, chu project kaihruaitu ber chu Pi Mi Mi Aung-i hi a ni a. Khatia historical record siam theia an thil tih zawh hnu khan US President Joe Biden-a hnenah a project chungchang nena inkaihnawih thil pawimawhte a hrilhfiah zui nghal bawk tih hriat a ni.
He project hlawhtlinna ber chu, boruak (air) pan lutukin a tuam March palent kotlang (surface) chunga helicopter pakhat thlawhtir chu thil awlai tak a ni lo a. Khawvel leh March inkar hlat zawng avangin a ral atanga control theih a ni bawk si lova, chutiang dinhmuna he Ingenuity helicopter te-in amaha in-control a, a thlawk kual thei tak mai chu historical record tling a nihna leh a hlawhltinna laimu tak pawh a ni.
Kum 52 a nihin Space Scientist Pi Mi Mi Aung hian Electrical engineering, Master degree a zo a. Ani chuan, “Hetiang dinhmun thleng tur hian ka bei nasa hle a, Science leh Engineer subject bult hut hi hre chiang turin ka bei hmasa a. Keimah anga space scientist ni duh Myanmar naupangte tan chuan, thawhrimna, mahni zirlai hriat thiamna, Science leh Engineer subject bulthut hriat thiam, hlim taka lehkha zir, eng line hi nge ka tui zawng, enge nih ka duh tih hriat chian hmasak a, chu mahni chem kalna zawng hmang tangkaiin mahni thawh duh zawng hna chu in thawk thei dawn a ni,” tiin BBC kaltlangin thurawn a pe a ni.
